महान Tennis खेळाडू Chris Evert यांना अंडाशयाचा कर्करोग

क्रिस एवर्ट यांना गेल्या महिन्यात डिसेंबर 2021 रोजी कर्करोगाविषयी माहिती मिळाली. या आठवड्यातच त्यांच्यावर किमोथेरपी सुरू झाली आहे. एवर्ट म्हणाल्या, ‘‘मी आयुष्य छानपैकी जगले आहे. आता पुढे काही आव्हानांचा सामना करायचा आहे.’’ क्रिस एवर्ट (Chris Evert) यांनी 18 वेळा टेनिस (Tennis) ग्रँडस्लॅम एकेरीचे विजेतेपद मिळवले आहे. जगातील अव्वल क्रमांकावर राहिलेल्या या टेनिसपटू आहेत. 1995 मध्ये त्यांना टेनिस हॉल ऑफ फेममध्ये स्थान मिळाले होते. क्रिस एवर्ट यांची बहीण जीन एवर्ट डुबिन यांचे 62 व्या वर्षी फेब्रुवारी 2020 मध्ये कर्करोगाने निधन झाले होते.

कोण आहेत क्रिस एवर्ट?

ऐंशीच्या दशकातील अव्वल महिला टेनिसपटू म्हणून क्रिस एवर्ट यांना ओळखले जाते. ‘क्रिस एवर्ट लॉयड’ या नावाने त्या प्रसिद्ध आहेत. त्या जगातील अव्वल क्रमांकावर सात वेळा (1974–78, 1980, 1981) विराजमान होत्या. कारकिर्दीत त्यांनी एकेरीत 157, तर दुहेरीत ३२ विजेतीपदे जिंकली आहेत. व्यावसायिक टेनिसमध्ये 34 वेळा ग्रँडस्लॅम स्पर्धेच्या अंतिम फेरीत धडक मारली. टेनिस इतिहासातला हा विक्रम 13 वर्षे त्यांच्या नावावर होता. एवर्ट यांची आणखी थक्क करणारी कामगिरी म्हणजे ग्रँडस्लॅम स्पर्धेच्या एकेरीत त्या कधीही पहिल्या किंवा दुसऱ्या फेरीत पराभूत झालेल्या नाहीत. तिसऱ्या फेरीत त्या फक्त दोनच वेळा पराभूत झाल्या आहेत. महिला टेनिसच्या इतिहासात त्यांनी सात वेळा फ्रेंच ओपन स्पर्धेचे विजेतेपद जिंकले आहे. अमेरिकन ओपन स्पर्धेचे विजेतेपद सहा वेळा जिंकले आहे. अमेरिकन ओपनच्या विजेतेपदांच्या विक्रमाची बरोबरी सेरेना विल्यम्सने केली आहे.

क्रिस एवर्ट यांच्याविषयी न ऐकलेल्या गोष्टी

• 1978 च्या अमेरिकन ओपनदरम्यान एवर्टचं डायमंड लाइन ब्रेसलेट कोर्टवर पडलं. त्या वेळी एवर्ट म्हणाली, “मी माझं टेनिस ब्रेसलेट खाली पाडलं.” तेव्हापासून डायमंड लाइन ब्रेसलेटला ‘टेनिस ब्रेसलेट’ म्हणून ओळखलं जाऊ लागलं.
• टेनिस कारकिर्दीत क्रिस एवर्ट यांनी एकेरीचे सामने तब्बल 90.00 टक्के जिंकले आहेत. ही टेनिस विश्वातील विक्रमी कामगिरी असून, हा विक्रम आतापर्यंत महिलाच नव्हे, तर पुरुष टेनिसपटूंमध्येही कोणी मोडीत काढू शकलेला नाही.
• एवर्ट यांच्या नावावर क्ले कोर्टवर एकेरीचे सामने जिंकण्याचे प्रमाण 94.55% आहे. महिला टेनिस संघटनेच्या पटलावर नोंदविलेला हा विक्रम आजही कोणी मोडू शकलेला नाही.
• 1973 मध्ये एका वर्षात 100 सामन्यांत विजय मिळवताना अवघ्या सात सामन्यांत पराभवाचा सामना करावा लागला. त्यांच्या नावावर हाही एक विक्रम आहे.

जिमी कॉनर्ससोबत प्रेमप्रकरण चर्चेत

क्रिस एवर्ट हिचं 1970 च्या दशकात जिमी कॉनर्स याच्याशी असलेलं प्रेमप्रकरण अधिक चवीनं चघळलं गेलं होतं. दोघेही यशाच्या शिखरावर असल्याने या लोकप्रिय जोडगोळीची चर्चा सार्वजनिक होणे स्वाभाविकच होते. 1974 मध्ये या दोघांनी एकेरीतील विम्बल्डनचं विजेतेपद जिंकलं. त्यानंतर या दोघांचं प्रेमप्रकरण अधिक चर्चेत आलं. एवर्ट आणि कॉनर्स हे दोघे मिश्र दुहेरीतही खेळले. अखेर या दोघांनी लग्नाचा निर्णय घेतला. त्या वेळी एवर्ट अवघी 19 वर्षांची होती. लग्नाची 8 नोव्हेंबर 1974 ही तारीखही निश्चित झाली. मात्र हे प्रेमप्रकरण फार काळ टिकलं नाही. त्यामुळे नियोजित तारखेला होणारा विवाहही रद्द झाला. असं असलं तरी त्यांचं प्रेमप्रकरण पुढेही काही वर्षे सुरू होतं. 2013 मध्ये कॉनर्स याने आपल्या आत्मचरित्रात एवर्टशी असलेल्या प्रेमप्रकरणाचा उल्लेख केला आहे. त्यात त्याने म्हंटले आहे, की एवर्ट गर्भवती राहिली होती. मात्र तिने एकतर्फी निर्णय घेत गर्भपात केला. आपलं खासगी आयुष्य अशा पद्धतीने उघड केल्यानं एवर्ट प्रचंड नाराज झाली. माझं खासगी आयुष्य चुकीच्या पद्धतीने सादर केल्याची नाराजीही तिने स्पष्टपणे नोंदवली होती.

क्रिस एवर्टचं वैवाहिक आयुष्य

क्रिस एवर्ट (Chris Evert)च्या प्रेम प्रकरणाबरोबरच वैवाहिक आयुष्यही टेनिस (Tennis) विश्वात नेहमीच चर्चेत राहिलं. तिचे तीन विवाह झाले होते. मात्र एकही टिकलं नाही. जिमी कॉनर्ससोबतचं प्रेमप्रकरण विवाहाच्या मांडवापर्यंत पोहोचलं नाही. मात्र, 1979 मध्ये एवर्ट ब्रिटनचा टेनिसपटू जॉन लॉयड याच्याशी विवाहबद्ध झाली. त्यामुळे ती क्रिस एवर्ट लॉयड या नावाने ओळखली जाऊ लागली. मात्र, हा विवाहही फार काळ टिकला नाही. त्याला कारण ठरलं ब्रिटनचा गायक आणि अभिनेता अ‍ॅडम फेथ याच्यासोबतचे विवाहबाह्य संबंध. त्यामुळे लॉयड याच्यापासून ती विभक्त झाली. मात्र, ‘लॉयड ऑन लॉयड’ या तिच्या आत्मकथेची सहलेखिका कॅरोल थॅचर हिने या दोघांना पुन्हा एकत्र आणले. अर्थात, त्याचा फारसा उपयोग झाला नाही. एप्रिल 1987 मध्ये त्यांनी विभक्त होण्याचा ठाम निर्णय घेतला.

1988 मध्ये एवर्ट स्की खेळाडू (बर्फावरचा खेळ) अँडी मिल याच्याशी विवाहबद्ध झाली. हा तिचा दुसरा विवाह. या दोघांना तीन मुलं झाली. अलेक्झांडर (1991), निकोलस (1994) आणि कॉल्टन (1996) ही मिल दाम्पत्याची तीन मुलं. हा विवाह अर्ध्यावरच मोडला. 13 नोव्हेंबर 2006 मध्ये एवर्टने घटस्फोटाचा अर्ज दाखल केला आणि 4 डिसेंबर 2006 रोजी दोघे विभक्त झाले. तडजोडीपोटी एवर्टने मिल याला 7 मिलियन डॉलरची रक्कम (आज हीच रक्कम भारतीय रुपयांत 52 कोटी 7 लाख 5 हजार 500 एवढी असती) मोजावी लागली होती.

मिलपासून विभक्त झाल्यानंतर एवर्टने बहामास येथे 28 जून 2008 रोजी तिसरा विवाह गोल्फर ग्रेग नॉर्मन याच्याशी केला. हा विवाह दीड वर्षही टिकला नाही. हे दोघे 15 महिन्यांतच विभक्त झाले. 8 डिसेंबर 2009 रोजी या दोघांनी घटस्फोटावर शिक्कामोर्तब केले.

एवर्ट सध्या काय करते?

क्रिस एवर्ट (Chris Evert) हिने भाऊ जॉन याच्यासोबत एवर्ट टेनिस अकादमी (Evert Tennis Academy) स्थापन केली आहे. फ्लोरिडातील बोका रॅटन येथे ही अकादमी असून, सेंट अँड्र्यू शाळेच्या संघाला ती प्रशिक्षण देत आहे. टेनिस मासिकातही ती लिहिते. ईएसपीएन वाहिनीवर ग्रँडस्लॅम स्पर्धांचे ती समालोचनही करते.

विजेतीपदे

157	32	7	6
एकेरीतील विजेतीपदे	दुहेरीतील विजेतीपदे	वेळा फ्रेंच ओपन	वेळा अमेरिकन ओपन

34	1309	146	382
वेळा ग्रँडस्लॅम फाय़नल	एकेरी सामन्यांत विजय	एकेरीत पराभव	क्ले कोर्टवर विजय

क्रिस एवर्ट यांची बायोग्राफी

• पूर्ण नाव : क्रिस्टिन मारी एवर्ट, अमेरिका
• निवास : बोका रेटॉन, फ्लोरिडा
• जन्म : 21 डिसेंबर 1954, फोर्ट लॉडरडेल
• उंची : 1.68 मीटर (5 फूट 6 इंच)
• टेनिसमधून निवृत्ती : 5 सप्टेंबर 1989
• शैली : उजव्या हाताची (दोन्ही हातांनी बॅकहँड)
• प्रशिक्षक : जिमी एवर्ट (Jimmy Evert) आणि डेनिस रालस्टन (Dennis Ralston)
• कारकिर्दीतील बक्षीस रक्कम : 88,95,195 डॉलर
• आंतरराष्ट्रीय हॉल ऑफ फेम : 1995
• शिक्षण : 1973 मध्ये फोर्ट लॉडरडेल येथील सेंट थॉमस अ‍ॅक्विनस हायस्कूलमधून पदवी

क्रिस एवर्ट यांचे या कट्टर प्रतिस्पर्ध्यांविरुद्धचे जय-पराजय

• 40–6 विरुद्ध वर्जिनिया वेड
• 37–43 विरुद्ध मार्टिना नवरातिलोवा
• 26–13 विरुद्ध इवोन गुलागोंग कॉली
• 24–0 विरुद्ध वर्जिनिया रुझिसी
• 23–1 विरुद्ध सु बार्कर
• 22–0 विरुद्ध बेट्टी स्टोव (Betty Stove)
• 22–1 विरुद्ध रोसमॅरी कसाल्स (Rosemary Casals)
• 21–7 विरुद्ध हॅना मांडलिकोवा
• 20–1 विरुद्ध वेंडी टर्नबुल
• 19–7 विरुद्ध बिली जीन किंगबिली जीन किंग : महिलांच्या अस्तित्वासाठी लढणारी टेनिसपटू
• 19–3 विरुद्ध पाम श्रायवर
• 18–2 विरुद्ध केरी मेलविले रीड
• 17–2 विरुद्ध मानुएला मालीवा-फ्रँगनिअर
• 17–2 विरुद्ध हेलेना सुकोवा
• 17–3 विरुद्ध आंद्रिया जेगर
• 16–3 विरुद्ध डायने फ्रॉम्होल्ट्झ बेलस्ट्रॅट
• 15–0 विरुद्ध ओल्गा मोरोजोवा
• 13–0 विरुद्ध फ्रँकॉइस डर
• 9–4 विरुद्ध मार्गारेट कोर्ट
• 8–9 विरुद्ध ट्रॅसी ऑस्टिन
• 7–0 विरुद्ध मेरी जो फर्नांडेझ
• 6–3 विरुद्ध गॅब्रिएला सबातिनी
• 6–5 विरुद्ध नॅन्सी रिची गुंटर
• 6–8 विरुद्ध स्टेफी ग्राफ
• 2-1 विरुद्ध मोनिका सेलेस

Follow on Twitter @kheliyad

[jnews_block_39 first_title=”Read more at :” header_text_color=”#dd3333″ header_line_color=”#dd3333″ include_category=”64″]